12.11.2024 Барлық жаңалықтар

Energo University-де Қазақстандағы ең үздік Huawei Академияларының бірі негізінде білім алып жатқан 25 студент Huawei ICT Competition беделді жарысының ұлттық финалына іріктеуден сәтті өтті.

18 қарашада Астана және Алматы қалаларында өтетін финалға шығу үшін қатысушылар бұлттық технологиялар (cloud), желілер (networks) және есептеу (computing) бағыттарының біреуі бойынша 600 баллдан жоғары жинауы қажет болды.

Үш институттың студенттерінен құралған Energo University командасын Huawei-дің сертификатталған нұсқаушылары, IT-инженерия және Киберқауіпсіздік кафедраларының тәжірибелі оқытушы-профессоры Татьяна Голубева және аға оқытушы Виктор Тайлаков дайындады. Ең жоғары нәтижелерді Сабина Тұрсынова, Даниил Дужнов, Әсем Бекмамбетова, Аманжан Сабырғали, Тимур Юн және Еңлік Дүйсен көрсетті.

Huawei ICT Competition 2024-2025 ұлттық кезеңінің қорытындысы бойынша Таяу Шығыс және Орталық Азия елдерінің желтоқсан айына жоспарланған аймақтық финалына қатысатын қазақстандықтар анықталады. Оның жеңімпаздары 2025 жылдың мамырында Қытайда өтетін жаһандық финалға барады.

Студенттерді және олардың тәлімгерлерін құттықтаймыз және алдағы жарыстарда сәттілік тілейміз!