02.12.2024 Барлық жаңалықтар

Ғұмарбек Дәукеев атындағы Алматы энергетика және байланыс университетінің (Energo University) ректоры Нығыметов Ғани және «Alageum Electric» компаниялар тобының негізін қалаушы Сайдулла Қожабаев стратегиялық серіктестік туралы меморандумға қол қойды.

Құжатқа сәйкес, Energo University, Кентау политехникалық колледжі және Кентау трансформатор зауыты («Alageum Electric» компаниялар тобы) Қазақстанның білім беру, ғылыми және өндірістік әлеуетін дамытуға бірлесе атсалысады.

Кентау трансформатор зауытының басшылығы атап өткендей, меморандум аясында жасалған келісімдер кәсіпорынға сапалы кадрларды дайындауға, сондай-ақ өндіріске озық технологияларды одан әрі белсенді енгізуге мүмкіндік береді.

Сонымен қатар, құжат зауыттың өндірістік алаңдары базасында студенттерді даярлау үшін жағдай жасауды көздейді, бұл олардың практикалық дағдыларын арттыруға және университетті бітіргеннен кейін сәтті жұмысқа орналасуына ықпал етеді.

- Меморандумға қол қою – білім, ғылым және өндіріс интеграциясына қарай жасалған маңызды қадам, – деп атап өтті Нығыметов Ғани. - Біз бірге энергетика саласы мен машина жасау саласында сұранысқа ие мамандарды даярлау үшін көп нәрсе жасай аламыз деп сенемін. Бұл меморандумға қол қою – Қазақстанның және оның өнеркәсіптік әлеуетін дамыту жолындағы «Alageum Electric» компаниялар тобымен үлкен жұмысымыздың тек бастамасы.

Анықтама:

Ғұмарбек Дәукеев атындағы Алматы энергетика және байланыс университеті (Energo University) – 50 жылдық тарихы бар, Қазақстандағы энергетика және инженерлік білім беру саласында көшбасшы жоғары оқу орны. Энергетика, автоматтандыру, ақпараттық технологиялар, телекоммуникация және ғарыштық инженерия салаларында жоғары білікті мамандарды дайындайды.

«Alageum Electric» компаниялар тобы – Қазақстандағы электротехникалық жабдықтардың ең ірі өндірушісі. Құрамына электр энергетикасы, электр машина жасау және құрылыс саласында табысты жұмыс істеп жатқан 30-дан астам кәсіпорындар мен зауыттар кіреді. Олардың арасында – «Кентау трансформатор зауыты» АҚ (Кентау қ.), «Asia Trafo» ЖШС, «Орал трансформатор зауыты» ЖШС, «Петропавл электротехникалық зауыты» ЖШС және басқалары да бар.