25.04.2022 Барлық жаңалықтар

2022 жылғы 25 сәуірде Ғұмарбек Дәукеев атындағы Алматы энергетика және байланыс университетінде (АЭжБУ) "Жаңартылатын энергия көздері бойынша өңірлік білім беру форумы" атты екі күндік семинардың ашылуы өтті. "Бұл іс-шара 2017 жылы басталған үлкен жобаның қорытынды кезеңі болып табылады. АҚШ Халықаралық даму агенттігі (USAID) мен АЭжБУ арасындағы өзара түсіністік туралы меморандум негізінде USAID "Болашақ энергиясы" жобасы жоғары білікті мамандарды даярлау үшін жаңартылатын энергия бойынша заманауи курсты әзірледі. Бұл курс АЭжБУ - да сәтті енгізіліп, Орталық Азияның бес елінің білім беру қоғамдастығы өкілдерінің қарауына ұсынылды", - деді USAID "Болашақ энергиясы" жобасы басшысының орынбасары Олег Рясков.

АЭжБУ Ғылыми және инновациялық қызмет проректоры Алмаз Саухимов өз сөзінде ЖОО-ның бірегей құзыреттеріне ғана назар аударып қоймай, сонымен қатар:  "Басты бағдар зерттеу арқылы білім беру бағдарламаларын үнемі жаңартып отыру болып табылады. Мұны әр үш жыл сайын  және ғылыми зерттеулерді орындау арқылы жасау керек. 10 жыл бұрын біз ЖЭК бойынша жұмысты бастадық, ол бүгінде біздің өмірімізде үйреншікті жағдайға айналды. USAID-пен ынтымақтастық бізге электрмен жабдықтау және жаңартылатын энергия көздері кафедрасының мүмкіндіктерін нығайтуға әрі кеңейтуге көмектесті" - деп атап өтті.

Форумның бірінші күнінде Қырғызстан, Тәжікстан және Өзбекстанның техникалық жоғары оқу орындарының жоғары өкілдері өз презентацияларын ұсынды. Екінші күні Қапшағай қаласындағы жел және күн электр станцияларына бару көзделеді.